Hopperstad stavkyrkje

Hopperstad stavkyrkje er ei av dei eldste stavkyrkjene i Noreg, truleg bygd omkring 1130. Viktige delar av mellomalderkyrkja er bevarte, mellom anna den særmerkte korskilleveggen, den opphavlege smale koropninga, utskorne portalar og ein måla baldakin over eit sidealtar. Hopperstad er den einaste stavkyrkja der den opphavlege smale koropninga er bevart. I mellomalderen vart det laga opningar med små bogar på kvar side av den smale korbogen. Den vestvende hovudportalen er eit fint døme på treskurd frå mellomalderen, med drakar og samansnodde ranker. Den sørvende portalen har praktfulle smijarnsbeslag. Baldakinen, frå omkring 1300, danna opphavleg ein himling over eit sidealtar med ein madonna- eller helgenfigur. Måleria viser Jesu fødsel og tidlege leveår. Hopperstad er ein av gardane i Vik med flest arkeologiske funn frå yngre jernalder. Det er mogleg at det voks fram eit høvdingsete her i vikingtida, og at ei stormannsslekt etablerte kyrkjestaden i tilknyting til gardstunet. Fleire forhold tyder på at Hopperstad stavkyrkje ikkje er den første kyrkja på staden. Under golvet vart det på 1880-talet funne to stavfragment med ornamentikk i den såkalla «Urnesstilen», oppkalla etter den godt bevarte nordportalen i Urnes stavkyrkje. Fragmenta er daterte til omkring 1050. Dei representerer dermed nokre av dei eldste bevarte restane etter kristendommen i Noreg. Kyrkja vart restaurert av arkitekten Peter Blix på 1880-talet. Restaureringa bygde på bevarte delar av den opphavlege kyrkja og samanlikningar med andre stavkyrkjer, mellom anna Borgund. Medan du er i Vik, kan du òg besøkje den vakre Hove steinkyrkje frå 1170. Ho ligg berre 1,5 km frå Hopperstad og er ei av dei eldste og best bevarte steinkyrkjene i Noreg.